Twitch, zuzeneko emankizunak emititu ahal izateko streaming plataforma bat da, bideo-jokoei oso bideratuta dagoena eta arrakasta ikaragarria duena. Oraingoz ez dago euskarazko emankizunak filtratzeko aukerarik, baina horretarako ekimena jarri da martxan.
Plataforma guztietan bezala, tartean euskaldunak ere badaude, baina disolbatuta daudela esan genezake. Izan ere, plataforma berak ez du emankizuna euskarazkoa dela etiketatzeko aukera ematen. Guztira 34 hizkuntza daude eta gainerakoak "beste hizkuntza bat" zakuaren barnean etiketatuta geratzen dira. Horrela, ez dago euskarazko streamingak zeintzuk diren filtratzeko aukerarik.
Eskaerak aurrera jarrai dezan, botoa eman beharra dago eta bozkatu ahal izateko Twitch plataforman erabiltzaile izatea beharrezkoa da.
Eskakizuna onartuz gero, euskarak Twitchen toki bat izango du eta euskal sortzaileak bideojokozale euskaldun gehiagorengana iritsi ahal izango dira. Argi izan behar da, hala ere, eskatzen dena ez dela Twitch plataforma bera euskaratzea, baizik eta plataforma horretako bideoak euskaraz etiketatu ahal izatea.
Eskaerak txikia ematen badu ere, aurrerapen itzela litzateke.