Pio XII kalearen izena aldatzearen aldeko mozioa aurkeztuko du EH Bilduk datorren asteleheneko Udal Osoko Bilkuran. "Herriaren memoria toponimikoa berreskuratzea" da ekimen horren heleburua , Jon Ander Altubek adierazi duenez. "Batzalarrin da Herriko Plazako zonaldeak historikoki izan duen izena”, azaldu du alkateordeak, “bertan egiten ziren aspaldi herriko batzarrak, zuhaitz handi baten itzalpean”.
Izena aldatuta “euskarari omenaldi bat” egin nahi diotela azpimarratu du Altubek. “Duela mende batera arte herri erabat euskalduna baitzen zen Laudio”.
Ibilbide luzeko ekimena
Pio XII kaleari izena aldatzearen afera aspaldidanik datorren kontua da. Kalearen izena Basalarrina izenagatik aldatzeko mozioa eztabaidatu zen udalbatzan duela sei urte, baina proposamenak ez zuen aurrera egin.
Badago beste arrazoi bat kalearen izena aldatu nahi izatearen atzean: Pio XII aitasantuaren figura. Ugariak dira nazismoaren eta faxismoaren aurrean aitasantu horrek izan zuen pasibotasun jarrera kritikatu duten historialariak.
Instituzioetatik harago, egin izan dira baita kalearen izena aldatzeko bestelako ekimenak. Iragan otsailaren 13an (Torturaren Aurkako Egunean) kalearen izena aldatzeko ekintza sinboliko bat egin zuen herritar talde batek. "Pio XII" jartzen zuen plaka kendu eta “Joxe Arregi” izena zuen beste bat jarri zuten. 1981eko otsailaren 13an hil zen Joxe Arregi Izagirre, Espainiako Polizia Nazionalak eragindako torturen ondorioz.
Ekimen horren nodik norakoak azaltzeko publikatutako bideoa:
[video:https://www.youtube.com/watch?v=WvcmN7-toeo]