Akordio bat sinatu du Koch Industries enpresa talde estatubatuarrak Guardianen kapital guztia erosteko, zenbait hedabideek jakinarazi dutenez. Modu horretan 2012an hasi zuen operazioa amaituko du taldeak. Guardianen kapitalaren % 44,5a erosi zuen Koch-ek urte horretan, 1.500 milioi euroren truke. Orain sinatutako akordioarekin gainontzeko % 55,5a erosi ahal izango du.
Estatu Batuetako enpresa talde handienetako bat da Koch Industries. 60 herrialdetan ditu lantegiak, 100.000 langile ingururekin. Irabazi asko lortzen ditu horrela: urtero 100.000 milioi inguru fakturatzen ditu, zenbait iturren arabera.
Merkatu eta Lehiaren Batzorde Nazionalak akordioa onartzea da operazioa guztiz amaitzeko falta den gauza bakarra. Hori kontuan izanik, erosketa 2017eko lehen hiruhilekoan egitea aurreikusi du Koch-en zuzendaritzak.
Lan baldintzetan aldaketarik ez
Akordio horren harira, zuzendaritzak adierazi du jabego aldaketak ez duela Laudioko lantegiko lan-baldintzetan eragingo, eta administrazio kontseiluan ere ez omen dira momentuz aldaketak aurreikusten.
Orain dela aste batzuk sinatu zen Laudioko lantegiko lan-hitzarmen berria, hiru urtez indarrean egongo dena.
Guardian taldeak bi lantegi handi ditu Euskal Herrian: Laudiokoa eta Tuterakoa. Juridikoki bi enpresa ezberdin gisa egituratuak daude. Hori dela eta, lan hitzarmen ezberdinak dituzte.
Ibilbide luzeko lantegia
Ibilbide luzeko lantegia da Laudiokoa. Vidrierias de Llodio (Villosa) izan zuen aintzidari. Delclaux familiak sortu zuen enpresa hori, Vidralarekin batera. 1985an, baina, Guardian Industries enpresa taldearen parte izatera pasa zen. 1932an Detroiten (Estatu Batuetan) sortutako multinazionala da hori Guardian.