ELA sindikatuak oharra plazaratu du jakinarazteko Guardian enpresako langile batzordeak sinatu duela hitzarmen kolektibo berria, hau da, sindikatu guztiek babestu dute.
Erakundeak modu positiboan baloratu du akordioa eta zenbait lorpen nabarmendu ditu: “lanaldiaren 3 eguneko murrizpena, soldaten igoerak KPIrekin gehi % 0,5 bermatua, 30 euroko igoerak hilabeteko, 5. eta 3. turnoen plusetan, 2. turnoentzako plus bat sortzea 30 eurorekin hilabeteko eta antzinatasunagatik ere diru-sarrera gehiago jasotzea. ABEren konplementua hobetetzen da, bai lan istripuagatik, bai gaixotasun arruntagatik. Mutualitateak ezin izango ditu gaixotasun arrunteengatik hartutako aldi baterako ezintasunak kontrolatu ezta kudeatu ere. Lan erreformaren aurkako blindajea mantentzen dugu eta oraindik dirauten kolektiboen arteko dizkriminazioekin bukatzeko aurrerapausoak ematen dira”.
LAB sindikatuak, bere aldetik, adierazi du abuztuaren hasieran "enpresak, ELAk eta UGTk sinatutako aurreakordioa" salatu behar izan zutela. "Aurreakordioaren arabera, lanaldia handitu egiten zen txikitu beharrean. Orain, ordea, gure salaketa eta lanari esker, LABek hasieratik eskatutako moduan jasotzen da testua, lanaldia handitzea ekidinez eta etorkizunean soldata eskala bikoitza ezartzearen arriskuari ateak itxiz", adierazi dute sindikatutik.
2012an greba mugagabea
2012an greba mugagabea gauzatu zuten Guardian enpresako langileek. Hilabeteak eman zituzten egoera horretan eta itxialdiak ere antolatu zituzten, besteak beste.
Izan ere, zuzendaritzak adierazi zuen hainbat langile kaleratuko zituela, hitzarmen kolektiboaren negoziazioaren testuinguruan.
Azkenean, borrokaren bitartez, hitzarmen kolektiboa eta adostasuna lortu zuten.