Datorren azaroaren 24an epaituko dute Iñaki Montes Bilboko Auzitegian. 5 urteko kartzela zigorra eskatzen diote JEZ enpresako langile batzordeko kideari, Troikaren aurka Bilbon 2014ko martxoaren 3an egin ziren protestetan parte hartzeagatik.
Fiskalak 2 urte eskatuko dizkio desordenak sortzeagatik eta beste 3 agintaritzaren aurkako atentatua leporatuta. 12 hilabeteko isuna ezarri nahi diote baita, eta 214.500 euroko kalte ordainak.
Iñaki Montesek behin baino gehiagotan aldarrikatu du leporatzen dizkioten akusazio guztiak faltsuak direla. Langileak adierazi du protestetatn kazetariek grabatutako bideoetan argi ikusten dela berak ez zuela istiluetan parte hartu.
(Hurrengo bideoan 1:49 minutuan ikus daiteke langilearen atxiloketa)
[video:https://www.youtube.com/watch?v=GxXTiGef9hc]
Manifestazio deialdia
Epaiketaren aurkako irakurketa kaleratu du JEZeko langile batzordeak. Epaiketa horren helburua “herritarren erantzuna erreprimitzea” eta “eskarmentu bezala erabiltzea” da, komitearen iritziz. Horregatik egin dute mobilizatzeko deia. Azaroaren 17an izango da manifestazioa (osteguna), 19:30ean, Laudioko Lamuza Plazatik abiatuta.
Hortaz gain, “entitate, elkarte eta langileen ordezkari guztiak” animatu nahi izan dituzte ekimenari “sostengua” adieraztera. “Mobilizazioa baino lehen publiko egingo ditugu jasotako atxikimendu guztiak”, adierazi dute.