Aitor Rey Gastaka Laudioko txirrindulariak hiru proba egin zituen Euskadiko Txapelketarekin. Persekuzio indibidualean 4 kilometro osatu behar izan zituzten pistan, erlojupekoan. "Zortzigarren egin nuen. Hasieran oso azkar ateratzea garesti ordaindu nuen. Duela asko ez nintzela pistan Espainiako txapelketan lehiatzen". Batetik, taldeak ez ziolako uzten, eta bestetik, erorketa bat medio ezin izan zuelako parte hartu. "Esperientzia ez izatea pixka bat ordaindu nuen, hasieran oso azkar atera nintzelako eta amaieran erritmoari ezin izan niolako eutsi", azaldu du.
Taldekako persekuzioan lau txirrindularik hartu zuten parte. Aitor Rey izan zen Euskadiko selekzioko ordezkarietako bat. Lehenengo egunean sailkapen fasea jokatu zuten, eta bigarrenean finala: "Valentziaren aurka lehiatu ginen, irabazi genituenez finala ziurtatua genuen, 1. edo 2. postua". Balear uhartekoekin neurtu behar izan zituzten indarrak, baina ez zuten zortea alde izan: "4tik 3 gutxienez amaierara iritsi behar ginen, eta bat asteburuko beste probengatik nekatuta zegoenez 2.kilometroan gelditu zen. Irabazi ezin genuela ikusi genuen, beraz, heltzera mugatu ginen".
Scrach-ean ere aritu zen Rey, 15 kilometroko lasterketan, "azken itzulian meta zeharkatzen duen lehenak irabazten du. Hor ere zortzigarren postua lortu nuen, hasieratik sentittu nintzen ondo. Itzulia irabazi genuenez talde gisa sprintean abantaila genuen". Bira bakoitzak 250 metroko luzeera du, eta itzulia irabazteak abantaila ematen dio azken sprintean lehiatzen ari denari.
Aitor Reyk positiboki baloratu ditu emaitzak : "Bi zortzigarren postu lortu ditut, eta taldekakoan bigarren geratu gara, zilarrezko domina lortu dugu". Denboraldia bukatuta, hurrengo urtea hasi arte atsedena hartuko du orain laudioarrak.