Laudion egongo dira gaur ETB1 telebista-kateko “Pintxo Pote” saioko kideak. Andoni Agirregomezkorta eta Asier Hormaza dira programaren gidariak. Herriz herri doaz bi aurkezleak, tokian tokiko pintxo pote eta gastronomiak ezagutuaz. Gaurtik larunbatera bitartean egingo dute Laudiori buruzko atala.
Hainbat laudioarren parte hartzea
Gaur goizean ekin diete grabaketei. Beldui txakolindegira bertaratu dira Agirregomezkorta eta Hormaza, eta Herriko Plazako azokan egongo dira eguerdian, Julen Reketarekin. Arratsaldean, berriz, pintxo-potea egiten duten tabernetatik ibiltzea aurreikusi dute. Kepa Sojo, Felix Mugurutza edota Yogurinha Borovarekin elkartuko dira, besteak beste.
Herriko tabernetatik grabatzen jarraituko dute ostiralean ere. Mikel Bazterra eta Joseba San Pedrorekin egongo dira goizean, Batzokian. Eguerdian, berriz, Iluntze kafetegira gerturatuko dira, bertako tabernaria den Hector Borgerekin mintzatzera. Arratsaldean emango diete bukaera ostiraleko grabaketei, Ibone Sanchezekin.
Pintxo eta Kazolatxo Mikologikoaren Ibilbidean
Larunbatean herrian egingo den VII. Pintxo eta Kazolatxo Mikologikoaren Ibilbidean ere egongo dira saioa grabatzen. Ederki tabernan egongo dira lehenbizi, Jesus Martin eta Jatsu Oseguerarekin. Angel Ortizen txokoa ere bisitatuko dute, eguerdi partean. Gozo Toki tabernan amaituko dituzte grabaketak, Edurne Ozaetarekin.