Bihar argitaratuko da Aiaraldea Egunkariaren zenbaki berria. Ohikoan bezala, askotariko gaiak izango ditu ardatz.
Azken bi asteetan eskualdean jazotako albiste esanguratsuenak topatuko ditu irakurleak lehen orrietan, Herriz herrikako atalean.
Sozioekonomia atalean lan gatazkak izango dira protagonista, Bañueta kiroldegiko greba eta Artiach-eko lanuzteak.
Jendartea atalean, berriz, oso bestelako gai bat jorratuko da: Pokemon Go jokoaren fenomenoa, eskualdeko ikuspuntutik.
Aiaraldeko basoak, gai nagusi
Erreportaje nagusia Joxe Blanco Gomezek egin du, Aiaraldeko basoen inguruan. Eskualdeko baso moten jatorria eta bilakaera jorratzen du artikuluak.
Kulturan bi idazleri eginiko elkarrizketak egongo dira: Andoni Murgari eta Inma Diezi eginikoak. Kirolean ere egongo da elkarrizketa bat, “gurdibela” deritzon kirolaren inguruan eginikoa Fernando Villaverde amurrioarrari. Beste hainbat kirol-albiste jasoko ditu egunkariak, azken egunetan jazotakoak.
Sonia Guerrini izango da kontrazaleko protagonista. Egipton egin duen aurkikuntzaren inguruko galderak erantzun ditu arkeologo laudioarrak.
Kolaboratzaile talde zabalak hartu du parte egunkariaren zenbaki honetan. Julen Arzuaga, Ane Landeta, Eneko Gastaka, Luis Vil, Mateo Pagazaurtundua eta Irati Marañon arduratu dira iritzi zutabeak idazteaz. Zinema proposamena Txetxu Urkijok egin du eta Aimar Gutierrezek, berriz, komikia.