Laudioko udal gobernu taldeak aurreratu du Altzarrateko Antzokiaren proiektua egiteko baldintza-agiria prestatzen ari dela. Izan ere, Jon Ander Altube alkateordeak adierazi du asmoa ez dela beste proiektu bat idaztea, baizik eta behingoz gauzatuko dena egitea.
EH Bilduko ordezkariak aipatu du ez dutela bakarrik kostuak zehaztu behar; koalizioko kideak azaldu du Antzokia, Zubiko Etxeko eta Lamuza Parkeko egitasmoekin uztartu beharko dutela.
Berez, Zubiko Etxean San Roke Musika Bandak hasi ditu bere saioak, gainera, liburutegia jarri nahi dute etorkizunean, eta urbanizazio lanak laster abiatuko dituzte. Lamuza Parkean obrak aurrera egin du Musika Etxean eta kasinoan ere esku hartzea egikarituko dute. Hori gutxi balitz, egokitu nahi dute San Roke Nagusien Egoitza ohia.
Aldagai horiekin guztiekin antolatu nahi dute Laudioko kultura ehuna eta kudeatu trantsizioa.
Aurrekontuetan jaso legez, 220.000 erabiliko dituzte proiektuan.
Inbertsioen xehetasuna
EAJk eskatu zion udal gobernu taldeari aurrekontuan adostutako inbertsioen egoera, eta horren harira egin du adierazpena EH Bilduk. Koalizioak hurrengoaren berri ere eman du:
-Aretako asfaltatze lanak bi astetan hasiko dira (400.000 euro).
-Argien aldaketa egin dute dagoeneko (60.000 euro).
-Aretako parkearen estaldura eraikitzeko 60.000 euroko lanen lizitazioa egiten ari dira.
-Padle zelaia egiteko proiektuaren erredakzioa kanpoko zerbitzuen esku dago (185.000 euro).
-Ellakuriko futbol zelaiaren aldaketa hurrengo udan gauzatuko beharko dute kirol denboraldiaren geldialdia profitatzeko (600.000 euro).
-San Roke erretiratuen klubeko hobekuntzetan 51.000 euro erabiltzen ari dira dagoeneko.
-Landa-eremuko bideen lanak egin dira Asuduin eta laster Larrazabalgoei ekingo diete.
-Ellakuriko aparkalekuaren -autokarabanentzat ere- proiektua bukatzen ari dira udal zerbitzuek (200.000 euro).
-Santa Luziako apaiz etxearen teilatua eta gero eraikina berritzeko lanak ez dira oraindik egikaritu (140.000 euro).
-HAPO berria osatzeko proiektua atzeratu da Laudioko Udaleko Hirigintza Saileko teknikariak aldatu direlako.