Laudioko Udalak bilera egingo du urriaren 20an Kultura Etxeko Arraño gelan 19:00etan azaltzeko 25 lanpostu eskainiko dituela laster enplegu programen bidez.
Horietako 15 berehala hasiko dira, azaroaren 15ean, alegia. 12 langile eta 3 langileburu kontratatuko dituzte 3 programa baliatuta; Arraño Larra eta Arraño Goienuri hobetzeko, espazio publikoetan konponketak egikaritzeko eta azpiegituretan eta bitarteko naturaletan hobekuntzak egiteko.
Horretarako 211.000 euroko diru-laguntza jaso du erakundeak. 6 hilabeteko kontratuak egingo dituzte eta soldata 1.100 euro ingurukoa izango da.
Lanbiden eta langabezian egotea beharrezkoa izango da
Lanpostu horiek zein gainerakoak lortzeko beharrezkoa izango da zenbait baldintza betetzea: Lanbiden izena ematea, langabezian egotea, 35 urte baino gutxiago edo 45 baino gehiago izatea, bazterkeria arriskua pairatzea...
Gainera, kontratatuen %40 emakumezkoak izango dira. Baldintza horien xehetasun guztiak azalduko dituzte urriaren 20ko bileran. Dena den, Lanbidek egingo du lehenengo hautaketa eta, gero, elkarrizketen bitartez gauzatuko dute behin betikoa.
10 lanpostu gehiago
Horietaz gain, bi enplegu programa gehiago prestatuko ditu tokiko erakundeak. Arabako Foru Aldundiaren diru-laguntzari esker 5 lorezain hartuko dituzte 6 hilabetez Arraño Larra garbitu eta atontzeko.
Aurrerago beste 5 behargin kontratatuko dituzte ibaia garbitzeko -akordio hori EAJk eta EH Bilduk adostu zuten aurrekontuetan-. Litekeena da kontratazio horiek motzagoak izatea, 3 hilekoak.
300.000 eurotik gorako inbertsioa
Guztira, diru-laguntzak eta berezko bitartekoak gehituta. Laudioko Udalak 347.000 euro bideratuko ditu enpleguaren sustapenera: 211.000 euro azaroko kontratazioetan, 86.000 Arraño Larrakoetan eta 50.000 Nerbioi ibaiko jardueretan.