Ruperto Urquijo musikari laudioarraren lana gordetzen eta zabaltzen aritutako Joselin Solaun Bikandi zena omenduko du Los Arlotes taldeak urriaren 14an, ostirala, “Gorbeia, kantuak eta kontuak”, Gontzal Mendibil eta Iñaki Garcia Uriberen ikuskizunaren birak Laudion izango duen emanaldiarekin batera. Hitzordua arratsaldeko 19:00etan abiatuko da Lanbide Heziketa Udal Ikastetxeko areto nagusian eta sarrera doakoa izango da.
Emanaldian “Gorbeiako mendian” kantua, jatorriz Ruperto Urquijok idatzitako “Lusiano y Clara”, eskainiko dute, besteak beste, Arloteek Andere abesbatzarekin batera. Joselin Solaun Bikadiren alargunari, Aurorari, eskainitako kantua hau izango da, omenaldiaren ardatzetako bat bihurtuz. Ekitaldiaren prestakuntzan San Roke kofradia eta Goikogane Mendi Taldea ere aritu izan dira.
Joselin Solaun Bikandi
Joselin Solaun Bikandi, Laudio 1911-1988, lanbidez igeltsero aritutakoa, musikarako trebezia erakutsi eta landu zuen txikitatik, egun ezagutzen den Ruperto Urquijo musikariaren lana jaso, egokitu eta zabalduz. Gerra zibilaren ostean zabaldutako errepresioaren ondorioz Laudiotik ihes egin eta Palentziako Guardon bizi izan zen konfinatuta 1954 bitarte.
Joselin Solaunek Ruperto Urquijoren ondoan jasotako ondare musikala Los Arlotes taldeak 1964etik aurrera musikari laudioarraren lana bizirik mantentzeko egindako ibilbidearen ardatza da.
“Gorbeia, kantuak eta kontuak”
“Gorbeia, kantuak eta kontuak” ikuskizunak Zeanuriko Gontzal Mendibil musikariak abestutako Gorbeia mendiari eskainitako kantu bilduma eta Iñaki Garcia Uribe mendizale eta idazleak jasotako kondaira, ipuin mitologiko eta kantu herritarrak biltzen ditu.