Laudioko Udalak jakinarazi du Renfe prestatzen ari dela proiektua geltokia eraberritzeko, eta enpresaren asmoa dela 2017an lanak egitea. Horren harira, tokiko erakundeko ordezkariek nabarmendu nahi izan dituzte hiru elementu.
Alde batetik, geltokira sartzeko irisgarritasuna bermatuko dutela igogailuaren bitartez; azpiegitura berri horrek pertsonak zein zamak mugitzeko balio izango du. Izan ere, oraingo plataforma ez da guztiz eraginkorra, udalaren ustez.
Bestalde, estaldurak eraikiko dituzte bidaiariak busti ez daitezen. Zentzu horretan, aurreikusi dute bat egitea Bilboko norabidean. Gainera, Urduñako norabidean dagoena kendu nahi du Renfek, ikusgarritasun arazoak sortzen omen ditu. Horren ordez estaldura arinagoa jarriko dute.
Irisgarritasuna geltoki barruan
Udalak aurreratu du geltoki barruko irisgarritasuna ere landuko duela Renfek, baina ez epe motzera. Berez, nasak egokituko dituzte etorkizuneko bagoietara moldatzeko, baina egungo zerbitzurako ez dute balioko.
Balorazio positiboa
Udalaren aburuz, urrats garrantzitsua lantzen ari da enpresa eta herriko hainbat eragileren, herritarren eta alderdiren nahiari erantzungo dio. Hala ere, nabarmendu du irisgarritasun arazoak ez direla behin betiko konponduko.