Gaur udal osoko ez-ohiko bilkura egin dute Laudion sanrokeen datei buruzko herri-galdeketa gauzatzeko. Alderdi guztiek babestu dute proposamena PSE-EE ezik. Sozialistak abstenitu dira uste dutelako erabakia lotesle izan dadin partaidetza handiagoa eskatu behar dela.
Pasa den astean aurreratu bezala, Espainiar Kongresu eta Senatuko hirugarren hauteskundeekin bat egingo du galdeketak, eta egingo ez balira 2017ko urtarrilaren 16 eta 25 bitartean egingo litzateke.
Jaien balizko datak
Hiru erantzunen artean hautatzeko aukera emango dizkiete bozkatzaileei:
-Orain arteko datak mantentzea; hau da, abuztuaren 15, 16 eta 17 eta hileko azken 5 egunak.
-San Roke aurreko ostiralean hastea ospakizunak eta hurrengo igandean bukatzea, 10 eguneko jaiekin.
-Jaiak abuztuaren 15ean hastea eta 7 edo 10 egunez luzatzea.
Herri galdeketan parte hartzeko derrigorrezkoa izango da 16 urte edo gehiago izatea eta Laudion erroldatuta egotea. Bozkatzeko ordutegia 09:00etan hasiko da eta 20:00etan itxiko dute eta posta bidez bozkatzeko paradarik ez da egongo.
Boluntarioak beharko dituzte bozketa antolatzeko eta alderdiek ere ordezkariak proposatu ditzakete prozesua kontrolatzeko.
Gutxieneko partaidetza
Galdeketa lotesle izan dadin, deitutako laudioarren %20ak parte hartu beharko du. Bestela, udal osoko bilkuraren esku geratuko da akordioa lortzea.