Irailaren 25eko hauteskundeei begirako ekitaldia egin zuen Eusko Alderdi Jeltzaleak atzo Laudion. Bertan parte hartu zuten Iñigo Urkullu lehendakariak eta Andoni Ortuzar EAJko presidenteak. Eskualdeko beste politikari jeltzale batzuk ere egon ziren Laudion; Amurrioko alkatea den Josune Irabien edota alderdi jeltzalearen hautagaia den Almudena Otaola tartean.
Kofradia Egunean herrira egin zuen bisita aipatuaz hasi zuen Urkulluk bere mintzaldia. Jarraian igaro zen Eusko Autonomi Erkidegoaren egoera sozio-ekonomikoaren inguruko datuak aipatzera, azken lau urteetan “EAJren gobernuak bere hitza bete duela” frogatzeko. Datozen lau urteetan ere bide horretatik jarraitzeko konpromisoa erakutsi zuen lehendakariak. “Beste batzuk oasi eta irudipenen artean galdurik dauden bitartean guk lanean jarraituko dugu Euskadi Europara gerturatzeko, enplegu gehiago eta hobea sortzeko”.
[video:http://www.eaj-pnv.eus/adjuntos/pnvVideos/2662_video_e.mp4]
Aiaraldeko enpresak eredu
Helburu bat azpimarratu zuen Urkulluk: “Euskadiko Barne Produktu Gordina Europarena baino % 25 gehiago haztea urteko”. Zentsu horretan, formazioaren garrantzia azpimarratu zuen lehendakariak, eta Laudio jarri zuen horren adibidetzat: “Hemengo Lanbide Heziketa Ikastetxea abangoardian dago, Tubacex-en garatzen den puntako espezializazio programa batekin eta eskualdeko 11 enpresekin elkarlanean arituaz. Hori da gure eredua, eta zabalduko dugu”.
Andoni Ortuzarrek, bere aldetik, Madrili zuzendu zion bere diskurtsoaren gehiengoa. “Madrilek eta Eusko Jaurlaritzak kudeatzen dituzten gauzen arteko ezberdintasunei erreparatu baino ez dago ikusteko non dauden abandonua eta atzera pausoak eta non eraginkortasuna”, adierazi zuen.