Sindikatuak jakinarazi du ez duela lan-hitzarmenaren akordioa sinatuko
Guardianen urteko jardunaldia 1.620 ordutik 1.728 ordura igo nahi duela salatu du enpresako LABen sail sindikalak. Sindikatuak adierazi du hitzarmenaren negoziazioaren puntu nagusietako bat zela jardunaldi efektiboa 1.642,5 ordutik 1.620ra jaistea negoziatzea. Puntu hori beteko balitz langileak egunean 7,5 ordu lan egitera igaroko lirateke, ordaindu gabeko ordu erdiko atsedenaldi batekin.
Baina LABek salatu du enpresak aurkeztutako akordioaren zirriborroan 1.728 orduko urteko jardunaldia azaltzen dela, 216 lanegunetan banatuta, 8 ordu egunean. “Gaur egun daukagun jardunaldiarekiko 85,5 ordutako igoera dakar horrek”, azaldu dute sindikatuko kideek. “Negoziazio mahaian dauden beste kideek (enpresa eta sindikatuak) ziurtatzen dute langileei aplikatuko zaiena 1.620ko jardunaldia dela. Baina zirriborroan jartzen duenari begiratzen badiogu, hori enpresaren erabakien esku geratuko da”.
Soldata eskala bikoitza
Hortaz gain, sindikatuak azpimarratu du beste ondorio batzuk ere izango lituzkeela urteko jardunaldi igoera bat aplikatzeak: “Jardunaldia murrizteko eskaeretan edo ERTE hipotetiko batean, jardunaldiaren erredukzio edo suspentsioa 1.728 orduko jardunaldiaren arabera kalkulatuko litzateke”.
Igoerak soldata eskala bikoitza ezartzea ere ekarriko duela gaineratu dute sail sindikaletik: “baieztapen horiek egia badira, honek esan nahi du hemendik aurrera Guardian Laudio enpresan lanean hasiko diren langileei jardunaldi hau aplikatuko zaiela, eta beraz enpresan soldata eskala bikoitz berria aplikatuko dela”.
Aurreko guztia kontuan hartuta, LABek adierazi du ez dela “iruzur horren konplize” izango. Horregatik, sindikatuak ez du aurreakordioa sinatu eta dei egin die enpresako langileei “horrelako baldintzak jasotzen dituen hitzarmena baztertzeko”.