Latiorroko Jai Batzordeak aurkeztu egin du jada auzo horretako jaien egitarau gehiena. Irailaren 16tik 18ra bitarteko asteburuan ospatuko dira festak, eta ez dira gutxi egingo diren ekintzak hiru egun horietan auzoan. Ohikoan bezala, musika talde esanguratsuak egongo dira gau partean.
Ostiralean “Zarpazo! a Cicatriz” taldeak joko du. Cicatriz taldearen omenez sortutako taldea da; nahiko berezia, Cicatriz taldeko Natxo Etxebarrietaren anaia baita tributu horren abeslaria. Gauzak hala, 80. hamarkadako zenbait ereserki bergogoratzeko aukera paregabea eskainiko du taldeak.
Ondoren, The Middle Fingers igoko da oholtzara. Bi DJk, gitarrista eta trikitilari banak osatzen dute taldea. Euskal musika doinu elektronikoekin nahasten dute.
Larunbatean, berriz, Ze esatek! taldeak joko du. “Inoiz egin dugun diskoren onena” lan berria aurkeztuko dute gipuzkoarrek, eta euren beste hiru diskoetako abestiak ere joko dituzte. Hortaz gain, antolatzaileek aurreratu dute ostiral eta larunbatean herriko talde bana ere igoko direla oholtzara, baina oraindik ez dago konfirmatuta zeintzuk izango diren. Egitarau osoa irailean zabalduko dute.