Laudioko EH Bildu udal-taldeak aniztasun eta identitate sexualaren aldeko adierazpena instituzionala egitea proposatuko du ekainaren 27an, LGTBI eskubideen aldeko nazioarteko egunaren bezperan, egingo den udalbatzan
Diskriminazioa
Adierazpen proposamenak lesbiana, gay, bixesual, transexual, transgenero eta intersexualek oraindik ere pairatzen dituzten diskriminazio egoerak utzi nahi ditu agerian “zenbait kasutan bestelako diskriminazio egoerekin batu dira eta baztertze egoera larrietan utzi ditu” gaineratuta.
Horren harira, Euskal Herrian bertan ematen diren egoeran aipatzen ditu testuak: “etorkin ez heterosexualak; pobrezian bizi diren emakume lesbianak; beltzak eta transexualak direnak; familia nuklearrean oinarritutako bizi ereduekin bat egiten ez duten pertsonak; generorik gabeko identitateak dituztenak; etab. Arrazoi ezberdinengatik dira diskriminatuak pertsona hauek: arrazoi sozioekonomikoengatik eta baita genero arrazoiengatik ere”.
Homofobia, lesbofobia, transfobia
Adierazpenak homofobia, lesbofobia zein transfobiaren ondorioz gertatzen diren erasoak egunerokoak direla azpimarratzen du; kalean gertatzen diren eraso fisiko zein ahozkoetatik harago Euskaltzaindiak generoaren arabera egiten duen izenen katalogazioa, familia eredu bakarraren inposizioa bermatzeko ematen den eskubide urraketa edo liburu eta eduki multimedia sexisten hedapena ere salatzen ditu.
Nazioartean hainbat herrialdetan sexu askatasunaren aurka hedatzen ari diren legediak ere aipatzen ditu adierazpenak, giza eskubideen kontrako eraso gisatzat hartuta.
Elkartasuna eta kontzientzia
Bide batez, elkartasuna ardatz izango duen kontzientzia aldarrikatzen du adierazpenak, GLBTI kolektiboarekiko aurreiritziak, fobiak eta gorrotoak desagerrarazteko. “Alor guztietan ezinbestekoak diren lege eta gizarte aldaketak eginda: hezkuntzan, osasungintzan, komunikabideetan edota herritar askatasunetan. Horretarako ezinbestekoa izango da ahalduntze politikak bultzatzea gizarteko sektore ezberdinetan” gaineratzen du adierazpenak.
Politika instituzionalak eta baliabideak
Erakundeei dagokienez, azpimarratzen du oinarrizko askatasun printzipioaren barruan LGBTI kolektiboaren eskubide politiko, ideologiko eta zibilak babestuko dituzten politika instituzionalen garrantzia.
Mobilizazioak
Azkenik adierazpenak Euskal Herriko hainbat herri eta hiritan ekainaren 28an deitutako mobilizazioekin bat egiteko deia luzatzen du.
Ekainean zehar ugariak dira Euskal Herrian deitutako ekimenak. Ekainaren 28an manifestazioak egingo dituzte Bilbon Moyua plazan 19:30ean, Gasteizen Ama Zuria plazan 20:00etan, Donostian Bulebarrean 19:30ean eta Iruñean Autobus geltoki zaharrean 20:00etan.
Jaialdiei dagokienez Miarritzen 18an ospatu berri da “Lesbian & gay pride” jaialdia eta Bilbon 23tik 26a bitartean “Bilbao pride” programa burutuko dute bertoko alde zaharra eta Bilbo zaharreko ostalari elkarteek eta Bilboko promoziorako erakundeek antolatuta. Basaurin berriz “Beste sexualitateak” zine zikloa burutzen ari dira Sozial Antzokian EGHAMen eskutik ekaineko ostegunetan.