Aretako Goikoetxe baserria kultur-ondare izendatua izan zen eta monumentu kategoria du. XVII mende bukaeran edo XVIII mende hasierakoa den baserri hau jabego pribatukoa da eta oso egoera txarrean dago gaur egun.
Ekainaren 4an Udaltzaingoak txostena egin zuen baserriaren fatxadaren zati bat askatu zela jasotzeko. Udalaren arkitektoek ikuskapen bisita egin zuten eta baserriaren inguruan balizak jarri zituzten kalteak ekiditeko.
Aste bat beranduago ikuskapen bisita berria egin zen. Bigarren bisita hau Arabako Foru Aldundiaren Ondare Historiko eta Arkitektoniko Zerbitzuaren bi arkitektorekin batera egin zuen Udalak. Goikoetxe baserriak egonkortasun bermerik ez duela ondorioztatu zen, bere egoera txarra dela eta fatxadako zati gehiago askatzeko eta errepidera jausteko arriskua dagoela.
Gauzak horrela, gauzatze agindu bat bidali die Udalak baserriaren jabeei, segurtasun arrazoiengatik eta kultur ondarea babesteko helburuarekin hainbat neurri hartzeko aginduz. Izan ere, monumentu izendatutako ondare baten jabe direnak monumentua babestu eta zaintzera behartuta daude legez.
Bi mailako neurriak agindu ditu Udalak
Udalak bidalitako aginduan bi mailako neurriak zehazten dira.
Alde batetik jabeek eraikuntzaren finkatze osoa egin beharko dute, goi mailako tekniko batek proiektua egin beharko du horretarako. Teknikoak erabaki beharko du lanen norainokoa, egoeraren diagnostiko zehatza egin eta gero. Proiektu hori osatzeko hilabete bateko epea zehazten da.
Beste aldetik, hainbat premiazko lan zehazten dira segurtasuna bermatzeko: fatxada nagusia eta teilatu hegalak mugarritu beharko dituzte jabeek eta sortu den zuloa estali beharko dute ur gehiago sar ez dadin. Lan hauei ekiteko epea aste batekoa da.