Kepa Galdós udal langile ohia 2012an hil zen pleuran izandako minbiziaren ondorioz. Senideen aburuz, amiantoak eragin zuen gaixotasuna, osagai horrek soilik sortzen baitu mesotelioma pleurala.
Horren harira, zendutakoaren senideek mozioa aurkeztu dute maiatzeko udal osoko bilkuran eztabaidatu dezaten. Testu horretan eskatuko dute udalak aitortu dezan amiantoak Kepa Galdós hil zuela eta, aldi berean, erakundeak ardura bere gain hartzea.
Senideek uste dute lanean amiantoa erabiltzeagatik sufritu zuela minbizia Kepa Galdósek. Izan ere, beharginak ez zekien osagai horrekin lan egiten zuela ezta bere arriskuak zeintzuk ziren.
Epaiketa
Udal langile ohiaren senideek eta erakundeak berak epaiketa izango dute ekainaren 13an. Berez, familiak exijitu dio udalari ardura bere gain hartzea ez ezik, neurriak ere har ditzan, amiantoa baitago oraindik udal azpiegituretan.
Epaitegira jo baino lehen, senideen eskaera aintzat hartzea baztertu zuen Laudioko Tokiko Gobernu Batzarrak 2013an. Hori dela eta, senideek gogor kritikatu dute udalaren jarrera.