Laudioko Udal Gobernu Taldeko bozeramailea Jon Ander Altubek azaldu du gaur Ellakurin egin nahi duten aldaketaren nondik norakoak.
Alkateordeak adierazi du zelai artifiziala jartzearen helburua dela konpontzea San Martingo azpiegituretan gertatzen ari den arazoa. Izan ere, CD Laudio eta Altzarrate KE klubek erabiltzen dute entrenatzeko eta kirolari guztiak egokitzea ez da erraza izaten ari. Guztira, ehunka gazte trebatzen dira astero Latiorroko azpiegituran.
CD Laudiok San Martin handitzea proposatu bazuen ere, udalak erantzun dio horrek prozesu luzea abiatzea ekarriko lukeela: ezjabetzak, URA agentziarekin adostu beharra, hirigintza moldaketak, inbertsioak...
Konponbide errazena
Erantzun azkar eta errazena, hortaz, zelai naturala ordezkatzea da, Jon Ander Altuberen aburuz. Egun, hilean bitan gehienez erabiltzen du zelaia CD Laudioko lehen taldeak eta urtero 25.000-30.000 euro inguruko gastua exijitzen du horrek.
Zelai artifizialari esker, kategoria guztiek bertan aritzeko aukera izango dute.
2017an lanak
Oraindik proiektua garatzeke badago ere, 600.000 euroko inbertsioa aurreikusi du udalak eta litekeena da lanak 2017ko udan gauzatzea.