Jalgi ekimenak bihurtuko du Aiaraldea euskal kultura eta sorkuntzaren plaza. Izan ere, 65 jarduera eta bi jardunaldi gauzatuko ditu maiatzaren 23tik 29ra eskualdeko 9 herrietan. Ondorioz euskal dantzak, zinemak, musikak, literaturak, antzerkiak, bertsolaritzak... bere epizentroa izango dute Aiaraldean.
Hala ere, gaur jarriko dute iniziatibaren lehen mugarria. Laudioko Lamuzako pilotalekuan aurkezpena egingo dute 18:00etan eta interesa duen edonork parte har dezake, egitasmo publikoa eta irekia baita.
Ekitaldian antolatzaile eta sustatzaileek -Ahotseneak, EHAZEk, Euskaltzaleen Topaguneak, Euskal Herriko Bertsozale Elkarteak eta Aaiaraldea Komunikazio Leihoak- azalduko dute egitarauaren nondik norakoak.
Aldi berean, babesleen ordezkari ugari egongo da; eskualdeko udal guztiak, Araba eta Bizkaiko Foru Aldundiak, Aiaratur, Eusko Jaurlaritza eta Aiarako Koadrila.
Nola ez, herritarren partaidetza espero dute guztiek.
Musika, literatura, solasaldia
Sorkuntzak gaurko agerpena zipriztinduko du musikaz, literaturaz eta hitzez -Mikel Ayllon, Igor Arzuaga eta uluka taldearen eskutik- eta gainera, askarirako tartea ere emango dute.
Hortaz, maiatzaren bukaeran Aiaraldean egongo diren artisten izenak ezagutzeko aukera paregabea izango da arratsaldekoa.