Bertan behera utzi du, momentuz, Epaitegi Konstituzionalak Eusko Legebiltzarrak onartutako Frackingaren aurkako legea; behin betiko erabakia hartu arte, behintzat. Agindua Espainiar Gobernuak jarritako helegitearen ondorioa izan da eta pasa den astean, hain zuzen, onartu zuen Laudioko Udalak horren kontrako mozioa.
EH Bilduk proposatuta, Omnia eta PSE-EE alderdiek bere babesa eman zioten ekimenari, Laudioko Udalak eska diezaion Espainiar Gobernuari ken dezan helegitea. PPk aurka bozkatu zuen eta EAJ abstenitu zen. Izan ere, jeltzaleek ordezko mozioa aurkeztu zuten.
Mozioak azpimarratu zuen Espainiar Gobernuaren errekurtsoa inposizioa hutsa dela, 103.000 herritarrek babestu baitzuten Herri Ekimen Legegilea. 2015eko ekainaren 30ean onartu zuten legea Eusko Legebiltzarrean
Bestelako eredu energetikoa lortzeko urratsak
Mozioa eztabaidatzekoan, zenbait alderdik aipatu zuten beharra Frackinga alde batean uzteko eta bestelako eredu energetikoa lantzeko.
Zentzu horretan, egun bereko udalbatzan beste mozio bat onartu zuten Laudioko Udala energia berriztagarriz hornitzeko aurrerapausoak eman ditzan.