Gardeako auzoak bere Santa Kurutze jaiei ekingo die maiatzaren 3an, asteartean. Egun horretan Andere abesbatzak 12:00etako mezan parte hartuko du eta horren ondoren kontzertua eskainiko dute. Gizarte Etxean luntxa prestatuko dute bertaratzen diren guztientzat.
Festetako egitarau oparoan, hala ere, haurrak izango dira protagonistak. Maiatzaren 7an, larunbatean, goizeko 11etatik aurrera jolas parkea eta makilaje tailerra izango dute Gardeako Kultur Guneko atzealdeko jolastokian 14:00ak arte. Arratsaldeko 16:30etan buruhandiekin jolasteko aukera izango dute Galtzagorri Kultur Taldearen eskutik. 17:30etan Patata Tropikalak 'Nada es lo que parece' ikuskizuna eskainiko die txikiei. 18:45etatik aurrera txokolata izango dute eta 19:45etan DJ Xaiborrek 'Euskalzumba' bere emanaldi berriari ekingo dio 21:00ak arte kiroldegiko aparkalekuan.
Jaiak maiatzaren 8ko eguerdian amaituko dira. Goizean Lankaietako Lagunak txistulariek eskainiko dute kalejira eta Kilkerrak antolatutako euskal dantzen emanaldia hasiko da 12:00etan.
Bolatokiko Santa Kurutze Sari Nagusia
Maiatzaren 6 eta 7an, ostirala eta larunbatean, Gardeako bolatokiak hartuko du Ruperto Urkijo Bolatoki Klubak urtero antolatzen duen Bolatokiko Santa Kurutze Sari Nagusia. Gaztee txapelketa izango da ostiralean 17:30tik 18:30ra eta larunbat goizean, 10:30etatik 11:30etara. Senior eta emakumeen kategoriaren txanda, berriz, ostiralean izango da, 18:30etik 20:00etara eta larunbatean 11:30etatik 12:30era.