Omniak kritikatu du EH Bilduk eta EAJk proposatzea Laudioko udaletxe zaharra Aiarako Koadrilaren egoitza izatea. Taldeak salatu du bi alderdi nagusien artean adostu dutela proposamena gainerakoekin hitz egin gabe.
Proposamena hurrengo udal osoko bilkuran eztabaidatuko dute eta Omniaren ustez batzorderen batean landu beharreko gaia da, udalbatzara heldu baino lehen.
Omniaren mozioak
Alderdiak hiru mozio aurkeztu ditu hurrengo udal osoko bilkuran eztabaidatu dezaten. Hasteko, Lanbide Heziketako Udal Ikastetxeko kontu-ikuskaritza eskatuko du, 2001. urtetik izan duen defizita aztertzeko. Auditoretza publifikazioa baino lehen gauzatu beharko litzateke. Izan ere, udala eta Eusko Jaurlaritza harremanetan daude sare publikoak har dezan bere gain ikastetxearen kudeaketa.
Alderdiaren bigarren ekimenak landuko du energiaren esparrua. Berez, Omniak proposatuko du hornidura elektrikoari lotutako kontratu guztiak bakarrean esleitzea. Gainera, esleipenak lehenetsi beharko luke enpresa izatea kontsumo kooperatiba, ordaintzen ez duenari elektrizitaterik gabe ez uztea etxean. Horrez gain, exijitu beharko litzaioke energia berriztagarria erabiltzea.
Bukatzeko, Omniak beste iniziatiba bat aurkeztu du ondare kultural izendatzeko zenbait kultur elkarte. Horri esker, tratu hobea lortuko lukete udalarekin. Hori erabakitzeko 3 irizpide proposatzen du alderdiak; teknikoa, politikoa eta herritarrena. Horietako kolektibo bakoitzak erabakiaren herena izango luke.