Laudioko Udaleko Berdintasun arloak doako hiru ikastaro prestatu ditu maiatzerako. Horietan feminismoa landuko dute hainbat dinamika eta ikuspuntu desberdinen bitartez.
Saioetako partaide kopurua mugatua da, beraz, aurretik izena ematea beharrezkoa izango da. Berdintasun zerbitzuak udaletxean dituen bulegoetara jo daiteke horretarako edo 94 403 48 50 telefonora deitu.
Faktoria Lila
Batetik, Faktoria Lilak gidatutako “Desprintzesatze” tailerra egingo dute, maitasun erromantikoaren dinamikek emakumeari suposatzen dizkioten bizipenak landu eta bakoitzak nahi duena izateko askatasuna izateko erremintak planteatuta. Maiatzaren 19an eta 26an izango dira saioak herriko Kultur Etxean, arratsaldeko 18:30etatik 20:30etara.
"Bellas a lo bestia"
Faktoria Lila elkarteak ere “Bellas a lo bestia” saioa eskainiko du maiatzaren 21ean eta 28an. Horretan gaur egungo gizartean ezarrita dagoen edertasun ereduaren gaineko hausnarketa gauzatuko dute eta, horrekin batera, haurtzarotik barneratzen diren estereotipo eta rolak jorratuko dute partaideek, emakumeengan horrek duen eragina komentatzeko. Ikastaroa goizez izango da, 10:00etatik 13:00era Kultur Etxean.
Feminismoa
Horretaz gain, mugimendu feministaz arituko den tailerra ere eskainiko dute. Maria Luisa Rebolledo Deschamps adituaren eskutik, mugimenduaren ibilbide soziala landuko dute, emakumeen egungo egoeraren barruan lorpenak eta aurrerapausoak emateko horrek izandako eraginaren aldeko kontzientziaren inguruko hausnarketa eginez.
Azken ikastaro hori maiatzaren 24, 25, 31n eta ekainaren 1ean izango da Kultur Etxean, arratsaldeko 17:30etatik 20:30etara.