Laudioko lau erretiratuk Huelvako “ElRocio-ra” erromesaldia abiatu zuten iragan apirilaren 2an, bi mandok tiratutako gurdian. Maiatzaren 8an aurreikusten dute Huelvara heltzea 1.000 kilometro baino gehiago zeharkatu ostean, guztira 45 bidaia egun.
Animalien defentsaren aldeko hainbat eragilek sinadura bilketa abiatu dute change.org izeneko atari digitalean. Eragile horiek bi mandoen esplotazioa salatu dute erretiratu taldearen gozamen hutserako eta azken zazpi urteetan, Huelva “ElRocio-n”, 107 zaldi baino gehiago hil direla azpimarratu nahi izan dute. Eskaera zuzena egin diote Polizia Nazionalari eta Guardia Zibilari erromesaldia eten dezaten.
Laudioarren babesa
Familia eta lagunak lau erretiratuen defentsan agertu dira. Egunean 30 kilometro besterik ez dituztela egiten adierazi dute eta bost egunean behin atseden egun bat hartzen dutela, bai eta bidearen %80a oinez egiten dutela ere, mandoekin batera.
Bidaian zehar igarotzen dituzten herrietan jasotzen ari diren tratu ona ere azpimarratu dute.
Familiarekin zer ikusirik ez duen norbanako batek, erromesaldiaren aldeko beste sinadura bilketa bati ekin dio aurreko atari digital berdinean, “Tradizioei errespetua” lelopean. 750 sinadura bildu ditu orain arte.