Igandean gauzatuko dute bigarren aldiz IRT Etiopia elkartasun lasterketa Laudion. Hori dela eta, aiaraldea.eus web-atariak streaming teknologia erabilita igorriko du lasterketa.
Ekimen solidarioan parte hartzeko aukera dago oraindik. Berez, sustatzaileak egongo dira Laudioko Plazan ostiralean eta larunbatean. Ekarpena egin nahi duenak, hurbildu besterik ez du egin behar.
Lasterketaren helburua
Laudiok Abay Nilo Azul GKEek antolatzen duen 'In Real Time Run with Ethiopia' lasterketaren bigarren edizioa apirilaren 17an, igandean, izango da.
Bi atletismo proba egingo dituzte Etiopiako Walmara inguruan abiatu duten haur zein helduen alfabetatze hezkuntza programara laguntzeko.
Laudio, Hondarribia, Almussafes, Malaga, Etiopia aldi berean
Aurten Laudio eta Hondarribia dira Euskal Herrian lasterketa hori hartuko duten herri bakarrak. Valentziako Almussafesen eta Malagako Frigilianan ere ekimen solidario honen alde korrika egingo dute egun horretan.
Bi proba mota
Laudio Atletismo Klubak 10:00etan hasiko du lasterketa nagusia, herriko erdigunetik 10 kilometroko ibilbidea izango duen zita.
Aldi berean egingo dute korrika ekimenarekin bat egiten duten beste tokietan zein Walmaran.
Horretaz gain, egun horretan 'Etiopiaren aldeko Familiarteko II. lasterketa solidarioa' ere gauzatuko da, haur zein nagusiei zabalik egongo den 1.500 metroko lehiarik gabeko ekimena.
Sasoian ez daudenei ere parte hartzeko gonbita luzatu die antolakuntzak, ibilbidea paseoan ere egiteko aukera egongo da eta. Parte-hartzeko interesa dutenek www.sailkapenak.com webgunean eman dezakete izena.
Halaber, egun berean, Abay Nilo Azul GKEak hainbat ekintza egingo ditu Laudion. Izan ere, bigarren eskuko produktuak eta joskera eskolan egindako materialak saltzeko denda solidarioa jarriko dute. Jardunaldiaren inguruko informazio gehiago jasotzeko www.inrealtimeabay.com helbidea kontsulta liteke.