Laudioko Udalak azaldu zuen atzo Lanbide Heziketako Ikastetxearen publifikazioaren hitzarmena jaso arte ezingo dutela aurrekontuen zirriborroa egin.
Jon Ander Altube EH Bilduko bozeramaileak adierazi zuen urtarrilean jaso behar zituztela Lanbide Heziketako Ikastetxearen publifikazioaren nondik norakoak, baina ez dutela egin oraindik.
Laudioko tokiko erakundeak jakin nahi du zer nolako eragina izango duen ikastetxeak sare publikoan txertatzeak. Horretarako, Eusko Jaurlaritzako Hezkuntza Saileko hitzarmena behar dute. Gainera, argitzeke dago noiz egongo den indarrean -urte hasieratik edo apiriletik, adibidez-.
Laudioko Lanbide Heziketako Udal Ikastetxea tokiko erakundeak kudeatzen du egun, eta azkenengo urteetan Eusko Jaurlaritzarekin adostu dute sare publikoaren esku geratzea. Hala ere, prozesu hori burutzea falta da hitzarmena sinatuta.
Adostasuna derrigorrez
Aurreko legealdian zein gaur egungoan EH Bilduko taldeak alkatetza lortu du, baina ez du gehiengoa. Ondorioz, gainerako alderdiekin adostasuna lortu beharko du aurrekontuak onartzeko. Beraz, zirriborroa landu ostean oposizioko taldeekin negoziatzeari ekingo dio.