Laudioko Arloteek 2014an Ruperto Urkijoren omenez egindako “Los Arlotes de Laudio y Ruperto Urkijo” liburua digitalki eta doan eskuratzeko aukera zabaldu dute berriki, poeta laudioarraren jaiotzaren 141 urteurrenean. Obra jasotzeko elkartearen laudioko.arloteak@gmail.com helbidera mezu bat idatzi behar da.
Arloteen lehen lehendakaria izan zen Joseba Andoni Ibarrolaren testuekin eta herritarren artxibo pertsonaletatik jasotako hainbat argazkirekin osatu zuten lan hau taldearen 50. urteurrena ospatzeko, orain dela bi urte. Hala ere, liburuak dituen 168 orrialdetan zehar koruak atzetik duen 100 urte baino gehiagoko ibilbideari errepasoa egiten zaio. Izan ere, jarduera oparoa izan zuten Arloteek Rupero Urkijok XIX. mendearen amaieran Rakatapla abesbatza sortu zuenetik gaur eguneko elkartea 1963an jaio zen arte. Orain ia 50 kide ditu taldeak, eta astero bildu ohi dira abestiak entseatzeko. Poeta ospetsuaren gaztelaniazko abestiak kantatzeaz gain, euskarazko zenbait kantu herrikoi abesteari ere ekin diote.