Alkateari bidalitako idazkiaren bidez, Arartekoak Udalak etxebizitza sozialen alokairuan aplikatutako igoeran irregulartasunik antzeman ez duela jakinarazi du. Horren bidez, Laudioko PSEk bidalitako kexarekin hasitako prozesuari amaiera ematen zaio.
Kexa hartan, PSEren ordezkariak alokairuen igoeran udal gobernu taldea arbitrariotasunez aritu zela salatu zuen. Horregatik, Arartekoari inbestigazioa zabaltzeko eskatu zion. Haren ustez, alokairuen zenbatekoaren eguneratzeak errenta %60 eta %120a bitarte igotzea eragin zuen. Horren ondorioz maizterren egoera ekonomikoa asko kaltetu dela eta horietako zenbait gizarte-bazterketa egoeratik gertu daudela babestu zuten PSEtik.
Arartekoak, jasotako kexa dela eta, Udalari azalpenak biltzen dituen informea eskatu zion. Bertan alokairua igotako etxebizitzen - denak Etxebizitza Sozialak Alokatzeko Udal Programaren parte dira- egoera juridikoa azaltzen da, hala nola alokairuak eguneratzeko erabilitako irizpideak. Gainera udal zerbitzu sozialek maizterren egoera ekonomikoa analizatzeko egindako pausoak jasotzen dira.
Laudioko udal etxebizitzen alokairua 2005ean eguneratu zen azkenekoz. Udalak egin berri duen eguneratzean 2010eko azaroaren 3ko Agintea betetzen dela eta maizterretako inor gizarte-bazterketa arriskuan ez dagoela iritzita prozesua amaitutzat eman du Arartekoak.