Laudioko EAJko udal taldeak adierazi du zenbait gaitan zentratuko dela 2016an. Horien artean, berebiziko garrantzia eman diote Antzokiari. Jeltzaleen ustez aurten heldu da “bere kokapena erabakitzeko unea, etorkizuneko eraikinak izango dituen balizko erabilerak definitzeko unea, proiektuaren erredakzioarena, eta bere kasuan, azpiegitura garrantzitsu hau lehen bait lehen egiteko finantza- formulak bilatzearena.”
Gainera, EAJk nabarmendu du eztabaida hori guztia Laudioko herri osoari dagokiola eta ez duela oztopatuko.
Eraikin publikoa
Oposizioan aritzen den talde garrantzitsuena azpimarratu du nahiz eta ibilbidea abiatu den zenbait eraikin publiko berreskuratzeko Lamuza Parkean, beste udal eraikin batzuk ere badirela eraberritzeke; esaterako udaletxe zaharra, Zubiko Etxea (bere garaian Gastronomia Museoa izan zena), Erroke Deuna erresidentzia zaharra, eta Goikoplaza baserria.
Zentzu horretan, EAJk nabarmendu du elkarteen beharrak aintzat hartu behar dituztela horretarako eta zenbait zerbitzu birkokatu behar direla (liburutegia, udal haurreskola eta gaztelekua, besteak beste).
Adostasuna
EAJren aburuz, etorkizuna diseinatzeko indar politikoen artean zubiak eraiki behar dituzte, adostasun zabalak lortzeko, herritar guztien mesederako gobernatzeko eta Laudiok aurrera egin dezan.
Zentzu horretan, jeltzaleak prest daude udal gobernu taldearekin lan egiteko eta hurrengo egitasmoak gauzatzeko: Hiri Antolamendurako Plan Nagusia, ondare arkitektonikoaren berreskuratze eta zaharberritzea, auzoetako Inbertsio Plana eta herritarren premiak asetzeko ekimenak eta asfaltatze eta argiteria publikoaren zenbait urtetarako berritze plana.