Laudion kokatua dagoen Imegar enpresako langileak lanuzteak egiteari ekin zioten astelehenean (otsailak 15). Nominen ordainketetan dituzten atzerapenengatik ekin diote mobilizatzeari. “Duela bizpahiru urtetik hona era jarraitu batean izaten ari garen arazoa da soldatak atzerapenarekin jasotzea”, azaldu du LABen ordezkaria den Iñaki Isusik, “eta azkenean edalontziak gainezka egin du”.
Ez dakite hurrengo soldata noiz jasoko duten, eta horretan datza arazo nagusia, delegatuaren esanetan: “Traba handiak suposatzen ditu zure bizitza pertsonala planifikatzerako orduan”. Hori dela eta, enpresari zenbait alternatiba proposatu dizkiote: “soldata bi edo hiru zatitan ordaintzea, adibidez”. Baina, salatu dutenez, enpresak ez die kasurik egin langileen eskariei. “Ordainketak egiterako orduan zerrendan azkenak gara langileak”, salatu du Isusik. Momentu honetan “kalitatezko paga” deritzona eta urtarrileko nomina zor dizkie enpresak langileei.
Soldatak ordaintzeko zailtasunak enpresak dituen zor batzuen ondorio dira. “Makina berri batzuk erostean sortu zuten zorra. Baina euren errua da hori”, azaldu du Isusik, eta gaineratu du makina horiek ez dutela hasieran uste zen bezain ondo funtzionatzen.
Herrira jaisteko asmoa
Lanuzteak egiten jarraituko dute langileek. Bi lanuzte ari dira egiten egunero, txanda aldaketetan. Bihar (otsailak 18) herrira jaisteko asmoa dute, herritarrei euren egoeraren berri emateko, merkatua dagoela baliatuta.
Otsailaren 29ra arte dute lanuzteekin jarraitzeko asmoa. Ordurako enpresak keinurik egingo ez balu, asanblada batean erabakiko lukete zer egin.
30 langile inguru dituen enpresa da Imegar eta galdarak fabrikatu egiten ditu.