Laudioko San Roke jaien inguruko hausnarketak darrai. 2014. urte amaieran daten inguruko eztabaida mahai gainean jarri zuen herritar taldeak lanean jarraitzen du eta orain jaiak antolatzeko era ezberdinak aztertzen ari dira auzokide eta elkarte horiek. Ekimen hau gidatzen ari direnen hitzetan, "Laudioko San Roke jaiak ez daude bere egoera onenean" eta "pertsona guztien indarrarekin eta lanarekin bakarrik lortuko dugu jaiak interesgarriak egitea herritar guztientzako". Norbanakoek herriko jaietan antolatzen dituzten ekintzen koordinazioa hobetzea ere xede dute.
Helburu horietan aurrerapausoak emateko batzarra irekia ospatuko dute otsailaren 23an. Herriko jaietan interesa duen edonori horretan parte hartzeko gonbidapena luzatu diote herritar eta elkarteek. Hitzordua 19:30etan izango da Kultur Etxeko Arraño aretoan.
Gardeako Jaiak
Bestetik, Gardeako Santa Kurutze jaiak antolatzeko bilera irekia ere ospatuko dute otsailaren 23an. Auzo batzarrean proposatu zuten moduan, prestaketa batzar hau irekia izango da eta festen koordinazioan parte hartzeko edo ideiak proposatzeko prest dagoen pertsona zein elkarte orori zabalik egongo da. Auzoko Gizarte Etxean egingo dute bilera arratsaldeko 19:00etan.