Laudion ospatuko da martxoaren 25etik 28ra Gazte Danbada; Aitzina eta Ernai gazte erakundeek antolatutako topagunea.
Lau egunetan eduki politikoa eta aisialdia uztartuko dituen ekimenaz gozatzeko aukera izango dute Laudion bilduko diren Euskal Herri osoko milaka gaztek. Tailer, hitzaldi eta eztabaida oparoez gain, musika eskaintza zabala ere iragarri dute.
“Esna harrapa gaitzala” da aurtengo Gazte Danbadaren leloa. Gazteek bizi duten egoera prekarioari aurre egiteko esna egotea ezinbestekoa dela adierazi dute antolatzaileek, gazteria itotzen duen zurrunbilotik irten eta bere bide propioari ekiteko. Bestelako herri eredu baten aldeko apustua jarri nahi dute mahai gainean Gazte Danbadan. Teoria eta praktikaren arteko koherentzia mantentzeko asmoa plazaratu dute antolatzaileek.
Aurreko edizioekiko hiru aldaketa nagusi dakartza aurtengo topaketak. Batetik, zaintza erdigunera ekartzeko apustua egingo dute. Bestetik, elikadurari dagokionez, bertoko produktuak kontsumituko dira.
Azkenik, musikaren alorrean, Gazte Oihua dinamika abiatuko dute aurten ere, Euskal Herriko sortzaile gazteei plaza emateko lehiaketa egingo dute, parte hartuko duten talde guztiei Gazte Danbadan bertan jotzeko aukera eskainiz. Talde guztietatik 15 aukeratuko ditu publikoak, eta horietatik hiruk karpa nagusian jotzeko aukera izango dute.
Aurrekariak
2013ko martxoan Gazte Danbadaren lehen edizioa ospatu zen Urduñan eta 2007an Gazte Martxak Aiaraldea zeharkatu zuen, Untzagan hasita Laudion bukatzeko.
