Eleberri grafiko bat kaleratu berri duzu, zeri buruzkoa?
Gabriel Aresti idazle bilbotarraren biografia moduko bat egiten saiatu naiz. Asko idatzi da Arestiri eta bere lanari buruz, ikerketak, tesiak eta baita biografia bat ere… Komiki honekin baina, obra baino, pertsona ezagutarazi nahi izan dut.
Nola ez, ezinbestean lotuta dago bere obrarekin, testuinguru politiko edo sozialarekin, baina batez ere, esan dudan bezala, bere bizitzako alderdi gertukoena azalarazi nahi izan dut.
Zenbat denbora eman duzu hori egiten eta zer nolako lan egin duzu?
Urtebete inguruko lana izan da. Arestiren inguruko zerbait ezagutu eta bere lan batzuk irakurriak izan arren, onartu beharra daukat ez nintzela jabetzen zer izan zitekeen pertsona baten inguruko biografia bat egitea.
Hau da, lehenik, Arestiren obra eta obraren inguruan idatzi direnak irakurri, gutunak, garaiari buruzko informazioa aztertu eta ulertu (politika, gizartea…) eta gero irudi aldetik dokumentatu eta familiak berari buruz kontatutakoarekin sintesi bat egin.
Bigarrenik, informazio horrekin guztiarekin narrazio ildo bat osatu eta azkenik marraztu.
Arestik Laudion lan egin zuen eta bere egonaldiak eragina izan zuen bere lanetan. Zer aztarna mota utzi zioten Arestiri Laudiok eta eskualdeak?
Arestik Zorrotzako portuko lana utzi eta 1960tik 1965era lan egin zuen Laudioko Maderas Reunidas S.A enpresan, administrazio lanetan.
Antza denez, kontent zen beharrean, izan ere, idazteko denbora uzten zion bere lanak, eta Euskaltzaindiko bileretara baimenik eskatu gabe joan zitekeen.
Edozelan ere, nagusien begietara poeta "iraultzailea" zenez edo, ez zioten ez kategoria ez soldatarik igo eta horrek amorrarazi egiten zuen.
Aiarako konterriari buruzko poemak agian horren adierazle izan liteke neurri batean.
Suposatzen dut komikia egin baino lehen Arestiri buruzko iritzi bat zenuela eta orain beste bat duzula, asko aldatu da?
Iritzia baino, ezagutza esango nuke. Nire kasuan, irakurriak nituen bere poema eta ipuin zenbait eta nola ez, bere hitzekin Oskorrik egindako hainbat abesti ezagunak zitzaizkidan eta asko gainera kantu herrikoiak diren gaur egun.
Baina ez neukan Arestiren izaera edo nortasunaren inguruko informazio zehatzik. Eta hortik bideratu nahi izan dut biografia moduko hau.
Durangoko Azokan egongo zara eta bertan komikia erosteko aukera izango du jendeak, horrez gain non eros daiteke?
Azokan Zenbat Gara elkartearen standean. Ahotsenean Astelehena, abenduaren 7an, 12:00tan aurkezpena izango dut. Eta Durangoko azokatik kanpo ohiko komiki eta liburu dendatan.
Lan honen ostean beste zerbait prestatzen ari zara edo bere promozioan zentratuta zaude?momentuz jarraipenari so nago, komikiak ea zer nolako garapena duen aztertzen.