Urrian izandako uholdeek Tindufeko errefuxiatu kanpamenduak kaltetu zituzten, urtetan eraikitako eskolak, ospitaleak eta tailerrak suntsituz eta zeuden elikagai urriak hondatuz.
Isabel Boveda zinegotziak adierazi duenez, Udalak Saharar herriaren alde lanean diharduten lau elkarteren elkartasun eskaera jaso du: Etawasol, Sahara Eutsi, Bizikidetasuna eta Solidaritatea Amurrio, eta SEADen Lagunen Elkarteak idatzia bidali dute errefuxiatu guneetan egoera oso larria eta laguntza behar beharrezkoa dela esanez.
Saharako Ilargi Erdi Gorriak ere urgentziazko deia egin du eta Fronte Polisarioarekin batera kontu korronte zenbaki bat ezagutarazi du laguntza ekonomikoa bideratzeko. Zuin udal aldizkarian argitaratu dira kontu korronte horren argibide guztiak.
Udalak 3.000 euroko laguntza ekonomikoa bidaliko du eta adierazpen instituzionala onartu du Saharako herriarekin kooperazioa indartzeko asmoa agertuz. Adierazpenean, herritarrei ahal duten neurrian erantzuteko deia egin eta antolatuko diren talde ekimenetan parte hartzeko proposamena zabaltzen du Udalak.
Ekimen hauetako bat izango da Saharako elkartasun karabana. Aurten 12. edizioa izango da eta otsaila bitartean jasoko dira Tinduferako eramateko elikagaiak.
Udalak Saharako herriarekiko konpromesua indartu nahi izan du, Bucraa herriarekin senidetzea eta herri koperatzaileen euskal fondoan parte hartzea berretsiz eta Sahara autodeterminazio librera eramango duten ekimenak laguntzeko asmoa agertuz.