Pasa den astean Tokiko Gobernu Batzordeak Gaztelekuaren gestioaren esleipenean parte hartzeko baldintzak ezartzen dituzten pleguak onartu zituen. Hautatua den enpresak bi urtez izango du espazioa ustiatzeko eskubidea, beste bi urtez luzatzeko aukerarekin.
Pleguetan ezarritakoaren arabera, alde batetik proiektua eta hobekuntzak eta bestetik arlo ekonomikoa baloratuko dituzte. Proiektuari dagokionez, programazioan ezinbestean menpekotasunen aurkako prebentzioak eta hezkuntza afektibo-sexuala landu beharko dira. Hobekuntzak, aldiz, eskaintzailearen esku.
Arlo ekonomikoan, berriz, 44.700 euroko muga ezartzen zaie urteko gastuei. Gainera langile, gestio eta ekintzen artean gastu hori nola banatzen den baloratuko dute. Zentzu horretan, udal gobernu taldearen arabera, langileen baldintzak duinak izan daitezen soldatetara bideratutako gastua gutxienez osoaren %75a izatea eskatzen da.
Horretaz aparte, ordutegi baldintzak ere ezartzen dira: astelehenetik igandera irekita egongo da, 17:00etatik 20:00etara, jai egun eta jai egun bezperetan izan ezik, non itxiera ordua 21:00etara luzatuko den.
Hamar urte
2015en Gaztelekuak 10 urte bete ditu. 2005ean jarri zen martxan, bi urte arinago hamar gazte inguruk osatzen zuten kolektiboak sinadura bilketari ekin ondoren. Bertan gazteak elkartzeko lokal bat eskatzen zuten.
Urte horietan zehar enpresa desberdinek gestionatu dute espazioa. Gainera, gastuak arintzeko Udalak Arabako Foru Aldundiaren laguntzak jaso ditu. 2015ean, esate baterako, 7210 eurotan lagundu zuen.