Ponata Pagadiko leize sareari sarbide berria aurkitu diote Takomano espeleologia taldekoek

Joxe Blanco 2015ko aza. 9a, 09:52

Takomano taldekideek azken asteburuetan lan mardula egin ondoren, Gorobel mendigunean (Aiara-Herriko lurrak) kokatutako Ponata Pagadiko leize sare garrantzitsuari sarbide berri bat bilatu diote, Burgoseko Rebollar-II harpetik, hain zuzen ere.

Ponata Pagadiko leize sareari sarbide berria aurkitu diote Takomano espeleologia taldekoek

Gogora dezagun, SI-44 markarekin ere ezaguna den leize sarea Arabako luzeena zen ia 50 km-tako garapenarekin. Losa Haranek sarbide berri honekin, leize sareari topatzen zaion laugarren ahoa da: bata Bizkaian dago eta beste biak Araban.

Ekimena Takomanoko kideena izan arren, AET/GEAkoen laguntza izan dute, lortutakoa talde biren arteko elkarlanaren emaitza izanik.

Aurkikuntzaren garrantzia handia da, sarbide berriak ateak zabaltzen baidizkio SI-44ko esplorazio sistematikoaren jarraipenari, bidea asko laburtzen duelako: vivac-a egin behar zen esplorazio puntaraino heltzeko eta orain ordu eta erdiko “bide samurra” besterik ez. Honek guztiak espektatiba handiak sortzen ditu: egun, 65 baino gehiago dira topografiatutako kilometroak, Euskal Herriko kobarik handienetakoa da eta aurreikuspenak askoz urrunago heltzeko modukoak dira. Takomanoko kideen ustetan, belaunaldi baterako baino gehigorako esplorazio lana omen dago.

Ponata Pagadiko leize sarearen historia

Arabako Espeleologia Taldeak (AET/GEA) Ponata Pagadiko leize sareko ohiko sarbidea 1983. urtean topatu zuen eta bere tamainari erreparatuta, berehala jabetu ziren garrantzi hidrologiko handiko leize sare erraldoi eta laberintiko baten aurrean zeudela. Hamarnaka kilometroko esplorazio zein topografia lanek amaierarik gabeko erronka agerian uzten zuten, lorpen bakoitzak ahotik urrundu ahala, logistika gero eta konplikatuago bihurtzen zuena.

1984ko erdialdean Burgoseko Edelweiss espeleologia taldeak Losako Salbadan kokatutako Rebollar kobazuloak esploratzen ditu. SI-44 ko sektore baten gainean egoteak eta Rebollar-II harpetik dabilen aire korronte indartsuak, koba biren arteko fisikoki ezinezkoa zirudien balizko lotura agerian uzten zuen. Aukera horren atzetik ibili dira urtetan zehar, AET/GEA-ko eta Takomanoko espeleologoak. Harri puska handiz osatutako lubiziaren zirrikituetatik zetorren aire korronteak gidatuta eta inurri lana eginda lortu dute azkenik bidea zabaltzea, baita leize biek bat egitea ere.

Kirola Laudio

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.

Izan bazkide