Laudioko Udalak hiru proposamen aurkeztu ditu Eusko Jaurlaritzako Ingurumen Sailaren laguntzen deialdiara. Jon Ander Altube zinegotziak azaldu duenez, hiru proposamen aurkeztu ahal ditu herri bakoitzak gehienez eta Udalak ahalegin berezia egin du aukera guztiak baliatzeko.
Deialdi honetara hiru arlo desberdinetako egitasmoak aurkeztu ahal dira: jasangarritasunerako heziketa, klima aldaketa eta atmosfera eta biodibertsitatea.
Zarataren inguruko sentsibilizazioa
Jasangarritasunerako heziketari dagokionez, “Eskola agenda 21” proiektua aurkeztu du Udalak aurreko deialdietan bezala. Edizio honetan ikasleak zarataren arazoaren inguruan sentsibilizatzea izango da helburua, 14.085, 85 euroko aurrekontua du proiektuak (BEZa barne).
Herriko diagonistiko akustikoa
Klima aldaketa eta atmosfera arlorako aurkeztuko den egitasmoak ere zaratarekin du harremana. Duela gutxi herriko zarata mapa osatu eta zarata araudia onartu du Udalak eta 2016rako ekintza plan bat osatzea da asmoa. Ekintza nagusiak udaltzaingoa araudiko sonometro batez hornitzea, zarata neurtzen trebatzea eta herri osoko diagnostiko akustiko bat osatzea izango lirateke, 18.089,50 euroko aurrekontuarekin.
Iñarrondoko biodibertsitatea babestea
Bideodibertitate arloan, duela gutxi Ermuko Santutegia eta Santa Luzia ingurua berreskuratzeko plana onartu denez, bertan dagoen Iñarrondo mendia babesteko proiektua aurkeztu du Udalak. Iñarrondoko flora inbentarioa eta faunaren errolda egitea, bertan dagoen artadia babestea, hainbat mendi hegaletan haritzak landatzea eta landare exotiko inbaditzaileak kentzea dira aurreikusitako ekintzak, 26.620 euroko aurrekontuarekin.