Laudioko oposizioan dauden talde gehienek plazaratu dituzte dagoeneko udal gobernu taldeari egindako udal zergen eta tasen inguruko ekarpenak. EH Bilduk aztertu beharko ditu erabakitzeko zenbat onartuko dituen.
Zergak jaistea edo izoztea
Jeltzaleek eta sozialistek proposatu dituzten ideien artean, garrantzitsuena da tasa, zerga eta prezio publikoak %0,9 jaistea. Haien ustez KPI -kontsumoko prezioen indizea- neurri horretan jaitsi da eta ondorioz hori islatu beharko litzateke zerga politikan. Jeltzaleek uste dute zergak izoztu behar direla gutxienez.
Hobariak
Jeltzaleek hiri izatea duten orubeen Balioaren Gehikuntzaren inguruko zergan hobari berriak proposatzen dituzte, jabetutako ondasuna oinordekoaren ohiko etxebizitza den kasuetarako. Horretarako, familia unitatearen diru sarrerak aintzat hartuko lirateke zati edo atalka.
Finean, kasu horietan hurrengo diru sarreren araberako hobariak gauzatu behar direla uste du EAJk:
- %100 hobaria 20.000,00 eurora arte.
- %95 hobaria 27.200,00 eurora arte.
- %75 hobaria 37.200,00 eurora arte.
Aldi berean, baratz ekologikoen tarifetan beherapena gauzatu behar dela azaldu du EAJk:
-
Ortu indibidualak hilabetean: 21,00 €.
-
Ortu bikoitzak/familia/kolektiboak, hiruhilabetean: 39, 00 €.
Neurri bera eskatu diote udal gobernu taldeari enpresa hazitegien lokaletan. Horrela, erabiltzaileek lehen urtean 9,00 euro ordainduko lukete metro karratuko eta hileko eta bigarren urtean 12 euro.
Kultur Etxeko ikastarotan asistentzia eraginkorraren araberako zatikako eta hilabeteko ordainketa iradoki dute jeltzaleek. Gainera, Laudion 2 urteko errolda dutenetzat eta 65 urte baino gehiago dituztenentzat beherapenak interesgarritzat jo dituzte.
Omnia
Alderdi indenpendenteak Ondasun Higiezin Zergaren inguruko hainbat proposamen egin ditu. Garrantzitsuena izan da etxebizitza hutsei OHZ igotzea, jabeek alokatu ditzaten.
Zentzu berean, eraikinetako fatxadetan dauden kutxazainei ere zerga igo behar zaiela iradoki du Omniak.
Sakelako enpresei dagokionez, sortzen dituzten erradiazioak direla eta zerga berria ezarri behar zaiela uste dute independenteek.
Hondakinen eta uraren zerbitzu igoerari buruz, Omniak uste du herritar guztiek ez dutela %5eko igoera izan behar. Horren ordez proposatu dute gehien erabiltzen duenak eta bitarteko diru gehiago duenak gehiago ordaintzea.