APILLek mikologia ibilbidea eta Halloween gaua antolatu ditu herriko hainbat denden eta tabernen partaidetzari esker. VI. Pintxo eta Kazolatxo Mikologikoen Ibilbidea hurrengo bi asteburuetan egingo da eta Halloween jaia urriaren 30ean eta 31n. Bi ekimenetan sariak banatuko dira.
Mikologia
Seigarren urtez Pintxo eta Kazolatxo Mikologikoen Ibilbidea egingo da urriaren 31ko eta azaroaren 7ko asteburuetan. 21 tabernetan 19 pintxo eta 14 kazolatxo dastatzeko aukera egongo da eta herri-bozkaketako kupoia edozein taberna partaidetan jaso eta zigila liteke. Zozketan sartzeko sei sorta dastatu beharko dira: kanpoaldeko tabernetako bat, bi kazolatxo eta hiru pintxo, alegia.
Parte hartuko duten tabernak hauek dira: Alboka, Iluntze, Ilargi, Gozo Toki, Kupela, Zubiaur, Azoka, Arkupe, Kaia, Aguzki, Haitzulo Barri, Arrañope, Lauri Barri, Odeibar, El Túnel jatetxea, Ederki, Aldatz, Gorka, Zuberoa, Karrika jatetxea eta Batzokia.
Halloween gaua
Urriaren 30ean eta 31n zenbait tabernak Halloween ospatuko dute. Parte hartzen duena “Port Aventura Halloween” jolas parkera bi lagunentzako bidaiaren eta 100 euroko bidaia-txekearen zozketan sartuko da. Bi egun horietan 20:00etatik aurrera ibilbide orria zigilatzen dutenak sartuko dira lehen zozketan.
Mozorroturiko pertsonek gainera, txekea jasotzeko aukera izango dute. Parte hartuko duten tabernak hauek dira: Alboka, Bonaire, Gozo Toki, Haitzulo Barri, Iluntze, Indriska, Kaia, La Meca eta Sorgin.
Aretan umeentzako jaia
Aretako Kultur Etxean haurrentzako Halloween disko-dantza egingo dute ostiralean 18:00etan.