NOEMI BERGANTIÑOS (Laudio, 1980)
“Contextos y perspectivas de la democracia: ensayos en honor a Pedro Ibarra Güell” liburua argitaratu duzu. Nola sortu zen aukera eta zein izan da prozesua?
Prozesu oso luzea izan da. Orain dela bi urte Pedro Ibarrarekin tesi doktorala egin genuen hiru lagun elkartu ginen eta bere erretiroa zela eta itzuli nahi genion aurreko urteetan berarekin irakatsi eta egindako guztia.
Unibertsitatean hainbat omenaldi egin izan dira eredu hau jarraituz eta egokia ikusi genuen. Izan ere, liburu honetan parte hartzen dugun guztiok Pedrok irakatsitako ezagutza, justizia eta demokraziarekiko konpromisoak isla izan du gure lanetan.
Aukera polita izan da ikustea eta adieraztea bere lanak izan duen eragina; ez bakarrik guregan baizik eta gizarte zientzietan oro har.
Nola baloratu duzu egindako lana? Zaila da elkarlanean liburua argitaratzea?
Oso pozik gaude liburuak izan duen harrerarekin. Pentsatzen dugu baliagarria izango dela hainbat urtetan Euskal Herriko Unibertsitateko Gizarte Zientzietan Fakultatean Pedrok zuzendu izan zituen hainbat ikerlan jasotzeko eta azaltzeko.
Egile gehienak Administrazio eta Politika Saileko kideak dira, baina badaude ere beste saileko lagun batzuk. Ekimena sortu zenean gonbidapena luzatu genion Pedrorekin elkarlanean egondako jende askori (ziur norbait ahaztu genuela…) eta erantzuna primerakoa izan zen.
Egia da hainbeste egile izanda zaila egiten dela planteatutako helburu guztiak betetzea baina pentsatzen dugu esperientzia polita izan dela.
Zein da liburuaren helburua? Zer eztabaida mota sortu nahi du?
Helburu nagusia Pedro Ibarraren lanak izan duen eragina eta balioa adieraztea izan da. Berak hainbat gai eta proiektu zuzendu izan ditu baina azpimarratzekoa da demokraziarekiko izan duen konpromiso pertsonala, politikoa eta baita akademikoa ere.
Horregatik, liburuak duen izenburuarekin gonbidatu nahi dugu jendea demokrazia kontzeptuak dituen dimentsio, ikuspuntu edota praktika zehatzak ezagutzera. Konplexutasun horretan aritzera lagundu zigun Pedro berak.
Hau da liburu batean parte hartzen duzun lehenengo aldia?
Ez, irakasle bezala nire lanaren parte bat da ikerlana eta ikerlanaren hedapena garatzea. Azken urte hauetan parte hartu izan dut liburu eta artikulu batzuetan, beti ere arlo akademikoan kokatzen direnak.
Pedrorekin ere argitaratu izan ditut beste lan batzuk eta orain berarekin koordinatzen ari gara liburu berri bat demokraziaren esanahiaren bilakaeraren inguruan, non erreferentziazko egile batzuen lanak jasoko ditugun.