Gardean kokatuta dagoen Talleres Arechaga enpresako akzio ugari -% 49,5 hain zuzen- enkantera aterako dituzte azaroaren 2an.
Hala ere, Talleres Jaulice, Caldereria Leuna eta Pigran Ugaoko langileen abokatuak helegitea jarriko du enkantearen aurka. Abokatuak uste du akats formalak eman direla prozeduran, besteak beste.
Konkurtso-prozesua
Talleres Arechagako akzioak konkurtso-prozesu baten barruan emango dira, Juan Antonio Jauregui Urrutikoetxearen aurkako prozesuan hain zuzen.
Pertsona hori Talleres Jaulice, Caldereria Leuna eta Pigran Ugaoko enpresek sortutako 7.000.000 euroko zorra sortzeagatik errudun jo dute epaileek eta hori dela eta Inversiones y Servicios Ovillan zituen akzioak enkantera aterako dituzte.
Ovillaren bitartez Talleres Arechagako % 49,5eko akzioen jabea zen Juan Antonio Jauregui Urruticoechea eta horregatik enkantera eramango dituzte.
632.000 euroko balioa
Lehenengo enkanterako 632.000 eurotan tasatu dituzte akzioen balioa eta lehenengo ekintza horretan % 60ra heldu behar da eskaintza. Bigarrenean modu askean egingo litzateke.
Dena den, Juan Antonio Jauregui Urruticoecheak zor ugari pilatu ditu. Elkargiri 210.000 euro zor dizkio, Banco Popularri 310.000, Talleres Arechagari 500.000 inguru eta Talleres Jaulice, Caldereria Leuna eta Pigran Ugaoko langileei -horietako batzuk Laudiokoak, Arrankudiaga-Zollokoak eta Urduñakoak- 800.000 euro, besteak beste.
Legeari iruzur
Langileen abokatuaren ustez Talleres Arechagak eskatu dituen zorrak legeari iruzurra eginez aurkeztu ditu. Juan Antonio Jauregui Urruticoecheako Talleres Arechagako akzioak dituztenez -% 0,5 alegia- enkanteko eskaintza handiena berdinduz eskuratu ditzakete eta.
Valvospain enpresako akzioak
Pasa den astean beste konkurtso-prozesu batean Valvospain taldearen -Amurrioko Lazaro Ituarte enpresako taldearen jabea- akzioak ere enkantera atera ziren. 2.500.000 euro eskaini zituen Errioxako talde batek.