Urriaren 8an bilera egin zuten Laudioko udaleko eta Arabako Foru Aldundiko ordezkariek; Iñigo Martinez Cerrillo zeinegotzi laudioarrak eta Cristina Gonzalez PSE-EEko diputatuak, hain zuzen.
Bileraren helburua enplegua izan zen eta EH Bilduko ordezkaria egindako balorazioa ez da bereziki baikorra izan.
Hasteko, Iñigo Martinez Cerrillok azaldu du Arabako Foru Aldundiak Laudioko udala baina diru gutxiago bideratzen duela enplegu planerako. Laudioko udalak 930.000 euro inbertitzen dituen bitartean, foru erakundeak 600.000 gastatzen ditu arabar lurralde osoan.
Gainera, Aldundian aurten inbertsioa areagotzeko asmoa badaukate ere, ez dute berebiziko igoerarik aurreikusi.
Laudioko udalaren eskaerak
Laudioko udalak 11 puntu helarazi zizkion Cristina Gonzalezi. Enplegu planak sustatzeko diru gehiago behar zuela azaldu zion Iñigo Martinez Cerrillok diputatuari. Iaz 50.000 euro erabili zituen Arabako Foru Aldundiak horretarako Aiarako Koadrila osorako eta.
Bestalde, herriko enpresekin elkartzeko gonbidapena luzatu zion zinegotziak, sinergiak, elkarlana eta trebakuntza bultzatzeko.
Trebakuntzari lotuta, plan zehatzak eskatu zituen udalak, orain arte egindakoak herrialdeko ikuspegi baitzuten.
Tokiko Garapen agentzien elkarlana erraztea, ekintzaileak babestea diru-laguntzekin eta lehen sektorea bultzatzea ere landu zuten, besteak beste.
APILL elkartearekin dagoen hitzarmena ere aipatu zuen udalak. Haien ustez Foru Aldundiak egiten duen ekarpen ekonomikoa handiagoa izan beharko litzateke. Egun, Laudioko udalak 20.000 eurorekin laguntzen duen bitartean Aldundiak 8.000 euro inbertitzen ditu merkatarien elkartean.
Laguntza europarrak
Bileran Cristina Gonzalez diputatuak aipatu zuen eskualde deprimituentzako diru-laguntzak lortzeko ahalegina egingo duela Arabako Foru Aldundiak.
Hala ere, Iñigo Martinez Cerrillo Laudioko zinegotzia ez da oso itxaropentsu agertu, eskualdeak ez du betetzen zenbait baldintza laguntza horiek jasotzeko eta.