Urriaren 24an Kultura Etxean goizeko 10:00etatik 14:00ak arte ekingo diote jaien daten inguruko eztabaidari. Gai horretan interesatuta dagoen orok parte har dezake hitzorduan baina ekimena gidatzen duen taldeak bereziki zuzendu du eztabaida kultur, kirol eta jai talde eta eragileei, merkatariei, talde politikoei eta herri etxeei.
Antolatzaileek espero dute 60 edo 80 pertsona inguruk ekarpenak egitea osatuko diren lan-taldeetan -world cafe eredua jarraituz-.
Hau prozesu baten lehenengo urratsa izango da, talde sustatzaileak ez baitu nahi eztabaida ika-mika politikoa bilakatzea. Hori dela eta adostasun zabala bilatuko du.
Eztabaidaren ildoak
Jaien daten inguruko hausnarketa bultzatu duen taldea iaz osatu zen eta ondorioz eztabaida ez da zerotik abiatuko. Dagoeneko lanketa zehatza egin dute taldekideek eta horren inguruan jorratuko dute iritzi trukaketa.
Horrela, lehenik eta behin mahai gainean jarriko dituzte zenbait aldagai; jaiek zenbateko iraupena behar duten, noiz kokatu behar diren egutegian, Bilboko jaiekin bat egingo duten eta abuztuko erdialdeko egunak txertatu behar diren.
Balizko datak
Egutegiari dagokionez lan-taldeak zabaldu dituen proposamenak hurrengoak dira: indarrean dauden datak mantentzea, abuztuko 15etatik 22ra egitea, abuztuko bigarren larunbatean hasi eta hileko hirugarren igandean bukatzea, abuztuko hirugarren larunbatean abiatzea eta hileko laugarren igandean amaitzea, abuztu eta iraila artean ospatzea eta bukatzeko, ekainean gauzatzea ospakizunak.