Laudioko udal gobernu taldeak prestatu du oposizioari helarazteko zergen inguruko zirriborroa. Bere asmoa da 3 batzordetan lantzea, ekarpenak jasotzea, adostasuna lortzea eta zerga araudi berria urriaren bukaeran edo azaroan hasieran prest egotea.
Hainbat irizpide mantendu
EH Bilduko taldeak zenbait irizpide ez ditu aldatu nahi, horrela, hobariak, ordainketa zatitua eta OHZren izozketa -Foru Aldundiak eragindako “catastrazo”-aren ostean- mantendu nahi ditu.
Gai sozialetan igoerarik ez
Zentzu berean, udal gobernu taldeak esparru sozialean kokatzen dituen zerga eta prezioak dauden moduan jarraitzea nahi du. Kirol jarduerak sartu ditu arlo horren barruan, besteak beste.
Zergen igoera
Laudioko udal gobernu taldeak igoerak proposatuko dizkio gainerako taldeei sozialak ez diren esparruetan. Igoera hori %1ekoa izan beharko litzateke, EH Bilduren ustez.
Hala ere, bi salbuespen ere planteatu ditu, zaborren kudeaketaren zerbitzua eta ura. Jon Ander Altube alkateordeak azaldu du orain zaborrak ez direla tratatzen Jundizen, Gardelegin baizik. Zabortegi berriak gastua 90.000 eurotan areagotu du eta ondorioz %5eko igoera proposatu dute.
Bestalde, ur zerbitzuan ere %5eko igoera beharrezkoa dela uste dute, “urte gutxi barru Basaurbe eta Markixanako araztegiak kudeatu beharko genituzke eta neurriak hartu behar dira horretarako”, adierazi du Jon Ander Altube