Udalak proiektua garatu du Latiorrondo kaleko ur saneamendua hobetzeko. Ekinbide nagusia saneamendu sarea lur publikora eramatea izango da. Izan ere, hirurogeigarren hamarkadan eraiki zen, etxeekin batera, eta lur pribatutan kokatuta dago. Hori dela eta, matxuraren bat egonez gero, arazoak sortzen dira konpontzerako orduan.
Horretaz gain, obrak aprobetxatuz, irisgarritasuna hobetzeari eta argiak aldatzeari ekingo diote. Argiak Laudioko beste hainbat kaletan bezala kontsumo txikiko LED sistemakoak izango dira.
Obra osoaren aurrekontua 332.338,28 eurokoa da. Aurrekontuetan jasota ez badago ere, Udalak aurrena proiektuaren erredakzioa nahi du, ondoren diru-laguntza publikoak lortzeko aukerarik dagoen aztertzeko. Proiektuaren nondik norakoak azaltzeko eta ekarpenak jasotzeko bilera egin zuten pasa den astean auzokideekin batera.
Aretako geltoki aurreko magaleko lur jausiak
Lur jausiak direla eta, Aretan, berriz, geltoki aurreko magalean konponketa lanak egingo dituzte. Konponbidea bilatze aldera, kontratazio espedientea abiatu du Udalak. 113.000 euro inguruko lana izango da eta larria denez prozesua ahal bezain beste bizkortu dutela jakinarazi dute.