Astelehenean udal osoko bilkura egin zuten Laudion. 18:00etan hasi zen udalbatza eta 22:40ak arte luzatu zen. Arrazoi nagusia udal gobernu taldearen eta oposizioaren arteko desadostasuna izan zen.
Nahiz eta EH Bilduko bozeramailea Jon Ander Altubek azaldu zuen EAJ, Omnia eta PP alderdiek aurkeztutako mozioen hainbat edukirekin ados zegoela, oposizioaren alderdi nagusiei -Omnia eta EAJ, alegia- leporatu zien gaiak behar den moduan ez lantzea -arloko batzordetan eta udal tokiko batzordean, hain zuzen- eta udalbatzara eramatea protagonismoa bilatzeko hedabidetan.
Oposizioak erantzun zuen ez duela udal gobernu taldearen jarduera oztopatzeko asmorik eta mozioen bitartez ekarpenak egitea duela helburu. Era berean, oposizioak argudiatu zuen mozio gehienek kutsu teknikoa zutela eta ez politikoa. Ondorioz, erantsi zuten ez zutela ulertzen zergatik leporatzen zioten udal gobernu taldea higatzeko asmorik.
Oposizioak aurkeztutako mozioen artean 3 teknologia berrien ingurukoak ziren.
Wi Fi, Streaming eta App
EAJ, Omnia eta PP alderdiek Wi Fi puntuak udal azpiegituretan jartzeko, udal osoko bilkurak streaming bidez igortzeko eta sakelako app bat -herritarren partaidetza sustatzeko- garatzeko mozioak aurkeztu eta onartu zituzten PSE-EEren babesarekin.
EH Bilduk aurka bozkatu zuen hasierako argudioei eutsiz -gai horiek batzordetan landu behar direla udalbatzara eraman baino lehen- Wi Fiaren mozioan ezik. Kasu horretan aurka bozkatu zuen zuhurtasun printzipioa argudiatuz.
Wi Fi-a eztabaidagai
Wi Fiaren mozioaren harira Latiorro Ikastetxeko guraso elkarteko kide batek hartu zuen hitza teknologia berri horren alde egin ez zezaten eskatzeko. Ama horrek azaldu zuen Wi Fi-ak sortzen dituen uhinak kaltegarriak izan daitezkeela bereziki umeen aurka eta ondorioz zuhurtasunez jokatu behar dela.
Alvaro Barrios Omniako bozeramaileak erantzun zuen dagoeneko hainbat Wi Fi uhin daudela ezarrita eta udal taldeek behar dutela teknologia hori, haien bulegotan ordenagailu eta konexio bakarra baitute eta horrek zailtzen die lana egitea.
Juanma Ibarretxe EAJko bozeramaileak aldiz adierazi zuen Wi Fi teknologiari buruzko hainbat txosten irakurri dituela eta kaltegarria denik ez dagoela modu zientifikoan frogatuta.
Antzokia