Laudioko EH Bilduk oharra zabaldu du epaitegiek udaletxean ikur espainiarra balkoian jartzeko agindua bidali ostean. Horretaz gain Natxo Urkixo alkateari 1500 euroko isuna ezarri dio Administrazioarekiko Auzietarako 3. gelak.
Horren aurrean koalizioak adierazi du: “EH Bilduk beste behin salatu nahi du Espainiako estatuak ikurrak inposatzen dizkiela Euskal Herriko instituzioei; hau da, euskal gizartearen gehiengo zabal batek inolaz ere bereak egiten ez dituen eta konpartitzen ez dituen ikurrak gure erakundeetan jartzera behartzen du estatuak.”
Inposiziotzat jo duen erabakiaren inguruan EH Bilduk azaldu du: “Espainiako estatutik euskal gizarteari egiten dizkion inposizioak gainditzeko tresna behar dugu, euskal herritarrek erabakiak hartzeko tresna eta baliabideak behar ditugu. Izan ere, euskal herritarrei dagokie erabakitzea zein ikur izango diren erabiliko dituztenak."
Ondorioz, EH Bilduk jakinarazi du ahalegina egingo duela euskal herritarrek bere eguneroko bizitzan eragina duten erabakiak hartzeko eta horretarako tresna izateko, ikurrekin lotutako gaietan ere bai.