“Aukeratu. Aldatu. Konbinatu. Zure mugikortasuna” lemapean, Europako Mugikortasun Astea ospatuko da irailaren 16tik 22ra. Aurten ere deialdiari atxikitu zaio Udalak eta neurriak hartu ez ezik, sentsibilizazio jarduerak ere egingo ditu. Gainera, azken hauetan parte hartzen duten herritar bakoitzeko zuhaitz autoktono bat landuko da Zuhaitz Egunean.
Lehenengo ekitaldia irailaren 19an egingo da Latiorroko jaien baitan. 08:00etan Latiorrotik mendi martxa bat irtengo da Jai batzordeak antolaturik. Hurrengo egunean, irailaren 20an, patin eta bizikleta martxa antolatu dute. Aldai plazatik irtengo da eta helmuga Latiorro izango du. Ibilbideak bi maila izango ditu: lehenak 6 kilometroko luzeera izango du, eta bigarrenak 11 kilometrotakoa. Izena emateak irteera puntuan (Kamaraka kalean) egingo dira 10:30etik 11:00era.
Autorik gabeko Eguna
Irailaren 22an, asteartean, Autorik gabeko Eguna dela-eta, bizikleta herrian zehar nola erabili jakiteko ikastaroa egongo da. Kurtsoa adinez nagusiko txirrindulariei zuzendua dago, errepideetan txirrindula era seguru batean erabil dezaten. “Bikeability” ikastaroa teoriko-praktikoa izango da, bi ordu eta erdiko iraupena izango du eta izen-ematea irailak 18 (ostirala) aurretik egin beharko da helbide honetan: a.valle@laudio.eus .